Luitenant-admiraal

In luitenant-admiraal is in opperofsier fan hege rang yn 'e nasjonale kriichsmacht fan guon lannen, yn 't bysûnder Nederlân. Dizze rang komt foar by de Keninklike Marine, dêr't er de âldere rang fan admiraal sûnt 1956 net mear bestiet. Bûtenlânske marines kenne yn 'e regel wol de rang fan admiraal, mar net dy fan luitenant-admiraal. Yn 'e Nederlânske kriichsmacht is de luitenant-admiraal by de marine ekwivalint oan generaal by de lânmacht, de loftmacht, de maresjesee en de mariniers. De oansprektitel fan in luitenant-admiraal is "admiraal". De boppelizzende rang is admiraal, en de ûnderlizzende rang is fise-admiraal. De letterlike betsjutting fan 'luitenant-admiraal' is "plakferfanger fan 'e admiraal".

Hoewol't oant yn 'e santjinde iuw eltse Nederlânske admiraliteit (Fryslân, West-Fryslân, Amsterdam, Rotterdam en Seelân) noch in eigen luitenant-admiraal beneamde, is dizze rang no sa goed as útstoarn. Inkeld as de kommandant fan de striidkrêften ta de marine heart, wurdt de rang fan luitenant-admiraal noch beklaaid.